A Asociación Veciñal do Saviñao ven de denunciar á Dirección Xeral de Xestión Forestal da Consellería de Medio Rural dúas prantacións recentes de eucalipto no municipio do Saviñao.

Trátase de dous núcleos, un próximo a Curveixe na parroquia de Santa Mariña de Rosende de 2,118 Has., e outro na Albariza e A Armada na parroquia da Broza de 7,985 Has.

Denúnciase que ditas prantacións teñen un e dous anos, polo que foron realizadas despois da moratoria aprobada pola Xunta contra a proliferación do eucalipto na comunidade.

Dada a proliferación de prantacións ilegais de eucalipto nos concellos do sur de Lugo, maila pertencer á VIII área forestal onde non está recomendada esta especie por Decreto da Xunta de decembro do 2016, a asociación veciñal, amparándose nun dos fins estatutarios básicos como é a protección do medio ambiente, manifesta a clara oposición á proliferación desta especie.

Os argumentos que avalan o rexeite do eucalipto, ó noso entender, son:

 1- Tratarse dunha especie foránea que traería en consecuencia a modificación da paisaxe e da natureza, destrozando os nichos biolóxicos de flora e fauna e alterando os cultivos forestais tradicionais.

2- Ser una especie invasora de moi rápida expansión e colonización do territorio.

3- Tratarse dunha especie pirófita que acelera a extensión dos incendios.

4- Contribúe a desecación do chan e das augas soterradas, causando o empobrezemento acelerado do solo e contribuíndo á aceleración do cambio climático.

 Consideramos que na zona sur de Lugo existen moitas especies de árbores autóctonas e tradicionais que deberían potenciarse dada a súa adaptación e integración, e tamén pola maior rendibilidade económica potencial: carballo, castiñeiro, nogueira, bidueiro, abelaira, frutais ( mazaira, pereira, membrilleira, érbedeira, etc ).

Con estes argumentos a asociación continuará denunciando este tipo de prantacións no municipio por considerar que o benestar xeral e o interese medio ambiental da sociedade do Saviñao debe prevalecer sobre o beneficio económico dos intereses paticulares.

Texto da denuncia 

FOTOS DA PRANTACIÓN DA ALBARIZA:

CROQUIS DA PRANTACIÓN MARRUBE-CURVEIXE:  

CROQUIS DA PRANTACIÓN DA ARMADA E ALBARIZA: 

A atleta máis premiada do Saviñao corre nunha cadeira de rodas. Nuria López vive, traballa e entrena na casa familiar de Licín, sen axudas nin apoio da federación de atletismo, a pesar de ter gañado 30 campionatos de España e outros títulos en copas do mundo, como a de París, na que conseguiu tres podios hai uns meses. Nesta competición, segundo nos contou ela mesma, os medios de comunicación dicían: “Gañou a atleta española”, pero en realidade Nuria non representaba a España, senón que foi a título persoal porque non fora seleccionada pola federación. Isto significa que ademais ten que pagar ela os desprazamentos ás carreiras.

Nestas condicións, e contando só coas pequenas aportaciónsque recibe, fáiselle imposible asumir a compra dunha cadeira de rodas adaptada, que custa 6000€. Agora ten unha de terceira man, moito mellor que a outra que tivo, de quinta man.

Sabendo destas dificultades, a Asociación veciñal do Saviñao decidiu en asemblea facer unha doazón humilde de 500 € para axudala a conseguir os seus obxectivos. Cando a visitamos e coñecemos as súas circunstancias, quedamos impresionados pola valentía, a vontade e a forza que demostra, tendo en conta as dificultades que ten que afrontar. Malia todo, ela segue adiante á súa maneira, porque lle gusta correr e tomar decisións. Desexámoslle moita forza e moitos éxitos.

A Asociación Veciñal do Saviñao, diríxese á Alcaldía do Saviñao coa intención de solicitar a adquisición da Casa Sindical da rúa Mendez Nuñez.

O 3 de febreiro saíu publicado no D.O.G. a poxa pola Consellería de Facenda e Administración Pública do edificio dos antigos sindicatos, dita poxa terá lugar no Edificio Administrativo da Xunta na Ronda da Muralla en  Lugo o próximo 17 de marzo. A poxa pública parte dun primeiro valor de 103.000 €, en segunda 88.000 € e 72.500 en terceira.

O edificio dos antigos sindicatos, denominado Lanca ou Campo da Virxe é unha construción de cantería de principios do século XX, ubicado nas proximidades da Devesa de Escairón, co que a súa adquisición por parte do Concello garantiría que nese solar non se constrúa en altura, aportando consenso urbanístico a esa zona de ocio. Dita construción está catalogada como patrimonio civil no PXOUM coa ficha AC-212 e a súa adquisición suporía un interesante incremento do patrimonio municipal.

O edificio actual de dúas prantas e 750 metros cuadrados por pranta ten capacidade suficiente para albergar no seu interior diversas salas e variadas actividades, polo que a asociación considera distintas posibilidades de uso no caso de ser municipalizado:

• A planta baixa podería adicarse a Local da Xoventude, unha vella reivindicación que nunca tivo resolución e que trouxo como consecuencia a deambulación das múltiples xeneracións de xóvenes polos bares ou á intemperie por non contar cun lugar de reunión ou a súa marcha a Monforte ou Chantada, causando desarraigo e fuga da xoventude..

• Poderíase asemesmo baraxar a posibilidade de ubicar nesa ampla planta baixa un Centro de Día para uso e desfrute dos nosos maiores, outra importante carencia de servizos do noso concello. Aínda que para esta actividade a asociación contempla mais idónea a remodelación do edificio de enfronte do antigo ambulatorio.

• A pranta superior podería distribuirse en varios locais para cesión ó diverso tecido asociativo do municipio para a realización das súas actividades, xa que a día de hoxe non hai posibilidade física de facilitar este dereito recollido no ROF e na LRBRL. Son varias as asociacións que non dispoñen dun local : os cazadores, a Asociación do Cabalo, as mulleres rurais, ou mesmo a nosa Asociación Veciñal do Saviñao .

Dada a inmediatez da poxa e o risco de que este edificio sexa adquirido por un titular privado e particular e considerando esta cifra perfectamente asumible para as arcas municipais, é a última oportunidade que terá o Concello de adquirir este ben patrimonial.

Por todos estes argumentos SOLICÍTASE da Alcaldía a participación na poxa para a adquisición deste inmoble para uso do conxunto da sociedade do Saviñao e dos diversos colectivos asociativos.

Na procura de que se actúe con responsabilidade e sentido de xestión da nosa colectividade, despédese de Vdes. A presidenta da asociación. Escairón a 7 de marzo do 2022.

Unha vez celebrada a poxa, coñecemos que non se presentou ningunha solicitude por este edificio. Aínda hai tempo para que o noso Alcalde recapacite.

 A Asociación Veciñal do Saviñao diríxese á Alcaldía e partidos da Corporación Municipal para propoñer a humanización e posta en valor do espazo do patio entre a Biblioteca e o Auditorio municipais.

Este espazo público, considerado como patio, está na actualidade infrautizado e case que abandoado maila estar ubicado no centro de Escairón. Dende a asociación propoñemos darlle algunha utilidade e humanizalo para que poida ser aproveitado como área de reunión e estancia das/os veciñas.

 Recentemente vimos como se enchía de público na actuación dos Contacontos “ Furafollas”, confirmando a aptitude deste espazo para actividades culturais e escenográficas na tempada de verán.

Dende a asociación propoñemos algunha medidas para que este espazo sexa aproveitado e utilizado a diario pola veciñanza:

• Eliminación do peche e da valla e conversión deste lugar nunha praza.
• Retirada do panel exterior para pegada de publicidade.
• Colocación duns bancos e mesas para uso social.
• Colocación de dous puntos de luz.
• Sustitución ou arranxo das pérgolas do Auditorio que presentan un avanzado deterioro.
• Adecentamento da caldeira da calefación e pintura dun mural para disimular esta instalación.

Coa finalidade de gañar un espazo público que a día de hoxe non ten utilidade, solicitamos da Alcaldía e partido da oposición sexan tratadas estas medidas e valoradas nunha sesión plenaria.

Escairón a 11 de outubro do 20121.