Na data do 21 de xuño do 2025 acodimos á VII asemblea da Federación de Asociacións da Ribeira Sacra ( FEARS ) da que formamos parte dende a súa orixe e colaboramos para manter a integridade do territorio e defender o modo de vida do noso entorno.

Aportamos as seguintes suxerencias:

1. XESTIÓN DA FEARS.

– Bótase en falta maior presenza da FEARS nos medios de comunicación, secundando as actividades das asociación vinculadas e facendo súas as vindicacións .

– CREACIÓN DUN SERVIZO DE ASESORAMENTO E INFORMACIÓN ÁS ASOCIACIÓNS.

De ser viable económicamente, sería de importancia este servizo de apoio ás asociacións no caso de trámites como subvencións, reclamacións, etc. Tamén mantería informadas as AAVV das axudas institucionais.

2. PROPOSTAS DA AV DO SAVIÑAO.

Solicitude de apoio da FEARS na oposición á implantación dunha planta de biogás no territorio R . Sacra e mais concretamente no noso municipio. Dirixir carta ó Alcalde do Saviñao e nota de prensa aos medios de comunicación.

3. ELABORACIÓN DUN GLOSARIO DE MEDIDAS PARA UN TURISMO SOSTIBLE.

Proponse:

• Evitar a modificación da paisaxe coa apertura ou ensanchamento das estradas ou con obras desproporcionadas.
• Sinalización no territorio da anchura das estradas e prohibición do tránsito de autocares superiores aos 6 metros. A circulación polo territorio débese facer en microbús.
• Prohibición do uso de quads e motos acuáticas no territorio BIC pola contaminación acústica que supoñen.
• Dotación de lanchas para salvamento fluvial ( zodiacs ), nos parques de bombeiros do territorio, dado o incremento de accidentes nas proximidades dos ríos e a dificultade dos rescates.

4. Denuncia das plantacións de especies arbóreas agresivas no territorio ( eucalipto ).

5. Busca dunha D.O. de calidade para productos do territorio: aceite, mel, froitos ( cereica, castaña, etc ), productos de horta, etc

Na asociación veciñal recibíronse diversas queixas pola falta de limpeza e roza en soares urbanos de Escairón pegados ás vivendas, co risco que isto supón. Temos coñecemento de que un veciño dirixíuse ata en tres ocasións ao Concello demandando esa limpeza obrigatoria sin recibir resposta algunha.

Dende a asociación veciñal SOLICÍTASE da Alcaldía:

–  a aplicación da lei 3/2007 do 9 de abril de prevención e defensa contra os incendios na Comunidade Autónoma, así como da consecuente ordenanza municipal, segundo a cal o concello debe avisar as persoas propietarias para que manteñan limpas as súas propiedades.

– De non realizarse esta limpeza, o Concello debe aplicar a “execución subsidiaria” contemplada no artigo 22.3 da devandita lei, que capacita ao concello a realizar os traballos de roza e a posterior facturación dos custos ás persoas propietarias.

Esperando a aplicación da lexislación vixente por parte da Alcaldía e en beneficio de toda a colectividade, despídese atentamente de Vde. a Presidenta da asociación.

Escairón a 9 de xuño do 2025

A Asociación Veciñal do Saviñao a través da súa Presidenta Celia Ferreiro Riazor, diríxese á Alcaldía do Saviñao coa finalidade de que se opoña frontalmente á implantación dunha planta de biogás no noso municipio.

O Saviñao é un territorio integramente rural, con características propias desenvolvidas ao longo de moitas xeneracións e cuns recursos que debemos conservar: a viticultura, a gandeiría, a apicultura e, nos últimos anos, as oliveiras e a agricultura ecolóxica.

Estamos nun momento en que se abren novos sectores productivos. A aparición do turismo sostible e o atractivo do territorio da Ribeira Sacra baseánse nos valores do patrimonio, a paisaxe e a natureza. Pretender trasformar o noso rural nun territorio industrial contaminante é, cando menos, contradictorio e perigoso, e pode traer consecuencias nefastas para o futuro da nosa comunidade.

Con todo, o máis grave son os inconvenientes que esta instalación lle vai causar á poboación, polo que cómpre que o goberno municipal rexeite á implantación desta amenaza ao noso territorio, como xa fixeron os representantes doutros concellos.

Dende a Asociación Veciñal do Saviñao, manifestámonos rotundamente en contra da instalación da planta de biogás no concello baseándonos nos seguintes argumentos:

• O noso municipio non necesita esta instalación. Preséntase esta industria como necesaria para a gandeiría do Saviñao; non obstante, este sector aproveita os xurros para a fertilización dos pastizais e da forraxe. Non se xeran excedentes, polo que non se precisa nin se xustifica unha industria para a súa eliminación.
• Estas plantas non só reciben residuos de puríns agrícolas, senón tamén lodos de depuradoras urbanas e de distintos tipos de industrias de toda a comunidade.
• Precisamente, debido á orixe industrial dos residuos, é máis que probable que conteñan metais pesados, o que supón un grave risco para as augas da zona afectada e para as cadeas tróficas animais. Ademais, xeraríanse CO2 e o metano, gases tóxicos para un entorno habitado.
• O transporte e o almacenamento dos residuos producirían molestos cheiros. Se non nos afacemos ao fedor dos xurros, que dura dous ou tres días, é difícil imaxinar como poderemos aturar a presenza diaria e constante que provocaría unha planta como a prevista. Débese ter en conta que a instalación estaría próxima a un territorio densamente poboado, que comprende distintos lugares das parroquias de Vilaesteva, Segán, San Vitorio e Chave, e que a 1,6 quilómetros está Currelos, o segundo núcleo de poboación do concello, onde hai centro de saúde e colexio.
• Os residuos resultantes verteríanse a un cauce fluvial, o que conlevaría a súa contaminación e a das augas soterradas que afloran nas fontes e mananciais. Os residuos irían ao rego de Sanxumil, e deste ao Riazón, afluente do Sardiñeira, que, á parte de ser a principal fonte de auga potable de Escairón, desemboca no Miño.
• O continuo tránsito de camións volquete e de cisternas polas estradas, estreitas e non adaptadas a estes vehículos, suporía unha molestia na circulación e incrementaría o risco de accidentes de tráfico.
• Este tipo de instalación contaminantes e molestas limitan ou mesmo impiden moitas iniciativas produtivas sustentables e rentables, como o turismo rural e cultural, a apicultura, e distintos tipos de cultivos.
• A produción de metano provoca riscos de accidentes na planta, como explosións ou incendios.
• Este tipo de industrias contradi os principios e valores dos fondos subvencionables Next Generatión, especialmente no que se refire á cohesión social e territorial, imposible de lograr habendo oposición da veciñanza ante unha actividade imposta.
• Se queremos optar á nominación a Patrimonio da Humanidade, temos que preservar a paisaxe, o medio ambiente e o patrimonio, valores que se verían seriamente comprometidos con esta actividade.
• En definitiva, a planta de biogás afectaría á vida cotiá da veciñanza e condicionaría o futuro da poboación do Saviñao. Precisamente por iso, este tipo de industria xa foi rexeitado en moitos municipios.

Por todas as razón enumeradas, solicitámoslle á Alcaldía e á Corporación Municipal que, representando a vontade veciñal, rexeiten categóricamente a implantación desta aberración industrial no noso concello. Non queremos que o noso municipio sexa un vertedoiro do lixo das urbes e das industrias. O goberno municipal cargaría coa responsabilidade de converter O Saviñao  nunha cloaca.

Na procura dunha decisión sensata e coherente para o futuro do territorio, despídese de Vde. a Presidenta da Asociación.

Dende este 19 de marzo e ata o día 31 esta exposición, coa temática da muller de hai un lustro, estará no baixo da Biblioteca de Escairón. Esta exposición foi facilitada pola Comunidade de Emprendemento e Emprego Rural Sostible e en colaboración coa Biblioteca Municipal.

A Asociación Veciñal do Saviñao diríxese á Alcaldía do Saviñao e ó partido da opopsición coa intención de trasmitir as peticións veciñais en relación coa xestión do lixo no municipio.

No seno da asociación recibíronse un bó número de queixas e peticións veciñais relacionadas coas carencias na xestión do lixo no territorio municipal. O resumo das mesmas é o seguinte:

• Maior frecuencia na recollida de lixo nas parroquias nos meses estivais, xullo e agosto, dada a acumulación nesas datas do lixo que rebosa dos contenedores. Dado o marcado incremento da poboación nesas datas solicítase o reforzo no servizo de recollida nese periodo.

• Reposición permanente dos contenedores deteriorados dada a grande cantidade deles que así o demandan por aparentar rotos, sen rodas ou sen tapa.

• Solicitar a limpeza periódica do interior dos contenedores para evitar os cheiros e lixiviados resultantes da basura acumulada.

• Pregúntase toda a veciñanza porqué si a recollida de lixo é selectiva nos contenedores, posteriormente, no vaciado destes nos camións que a trasportarán, mézclanse todos a excepción do vidro. Non ten sentido unha recollida selectiva nos domicilios si despois vai ir toda mezclada á planta tratamento.

• A propósito do suceso do incendio no agosto `pasado no “falso punto limpo “ do antigo mercado gandeiro, solicítase a creación dun Punto Limpo oficial que esté aberto a diario, ó menos media xornada matinal, e onde se clasifiquen e separen os distintos verquidos ( de obra, mobiliario, electrodomésticos, etc. ).

• Dado que a cuberta do vello mercado gandeiro é de uralita, considerada canceríxena polo amianto sobre todo si arde, é urxente a sustitución da totalidade da cuberta deste recinto.

Na procura dunha mellora neste servizo de extremada necesidade e interese para os veciños do concello, despédese atentamente de Vde. a Presidenta da asociación.

En Escairón a 6 de febreiro do 2025.

Vemos a diario como unha importante cantidade de veciños e veciñas se resgardan da chuvia e do vento baixo dos voladizos das casas do cruce de Escairón, mentres esperan o transporte público con dirección a Monforte ou a Chantada e Santiago. Esta  penosasituación agrávase nos meses de inverno, cando moitos estudantes deben desprazarse no coche de liña para acudir aos centros educativos.

Esta situación contrasta coa que se observa nas parroquias ou noutros barrios de Escairón, onde hai marquesinas, construídas no seu momento polo Obradoiro, que sinalizan as paradas e protexen as persoas que usan o trasporte escolar e público. É chamativo que a capitalidade municipal, sendo o punto máis poboado, careza deste servizo tan necesario.

A Asociación Veciñal do Saviñao, despois de recibir queixas por esta situación,

SOLICITA do Concello:

A ubicación de tres marquesinas que protexan das inclemencias metereolóxicas nas paradas dos autobuses nos seguintes puntos:

1. Dúas na rúa Pardo Bazán: unha entre os números 1 e 3, onde fai parada o transporte que vai cara a Monforte; e outra na beirarúa de enfronte, entre os números 2 e 4 onde para a liña con dirección Chantada e Santiago.
2. Unha na rúa Xosé Portela, entre os números 4 e 6, onde fai parada a liña que cubre o servizo Currelos-Escairón-Ferreira-Monforte.

É importante puntualizar que estas marquesinas teñen un tamaño pequeño, non maior co dun coche, polo que non deben supor un obstáculo.

Esperando que se lle dea solución a esta xustificada demanda da veciñanza, despídese atentamente de Vde. a Presidenta da Asociación.

Escairón a 4 de outubro do 2024.

A Asociación Veciñal do Saviñao, diríxese ao Consorcio de Turismo da Ribeira Sacra coa finalidade de tratar dous temas de ámbito turístico e de interese para o municipio do Saviñao: a solicitude de sinalización da ruta de sendeirismo PR-G 162 e as propostas para evitar o colapso da área da praia da Cova.

1. SINALIZACIÓN DA RUTA DE SENDEIRISMO PR-G 162.

Comprobamos que o Consorcio de Turismo sinalizou algunhas rutas de sendeirismo no territorio da Ribeira Sacra con sinais verticais metálicas de cor laranxa. Non obstante, a ruta dos concellos de Pantón e O Saviñao non foi sinalizada.

A ruta de sendeirismo da Ribeira Sacra do Miño, a primeira homologada no territorio do Miño e é a máis longa de toda a Ribeira Sacra, con 37 quilómetros, é adecuada para facer en dúas ou máis xornadas. Foi descrita polos numerosos grupos de sendeirismo que a visitaron como unha das máis atractivas e completas de Galiza.

O seu interese ven dado pola cantidade de elementos de interese paisaxístico, etnográfico e patrimonial que atravesa no seu traxecto: catro igrexas románicas (Sto. Estevo de Ribas de Miño, S. Paio de Diomondi, S. Salvador da Cova e Sto. Estevo de Atán), a calzada romana e medieval dos Codos de Belesar (que forma parte do Camiño de Inverno), o núcleo de Belesar e as dúas áreas fluviais do Miño (A Cova e Maiorga), así como a coñecida fervenza de Augacaída, ademais de atravesar numerosas aldeas que amosan unha arquitectura propia (Diomondi, Mourelos, A Cova, O Carballo de Ribeiras de Miño, A Míllara, Marce, Seoane de Atán…). O percorrido permite contemplar numerosos elementos paisaxísticos e etnográficos: a alternancia de viñedos en socalcos con frondosos bosques de caducifolias, os portelos que comunican as muras, as airas empedradas das mallas comunais, os pozos horizontais da ribeira …

Cremos que o interese desta ruta está sobradamente demostrado e que merece que se valorice e se coide, polo que lle solicitamos ao Consorcio de Turismo a correspondente sinalización cos sinais laranxa nos dous inicios da ruta, Sto. Estevo de Belesar e Segade, así como nos puntos intermedios do seu traxecto: Belesar, o Priorato da Cova e Maiorga.

2. PROPOSTA DE MEDIDAS PARA EVITAR O COLAPSO DA ÁREA DA COVA.

O Consorcio ven de recoñecer publicamente que a área da praia da Cova é un punto negro na Ribeira Sacra para a  mobilidade e que ameaza a sostibilidade do turismo que nos visita. Dende a Asociación repetimos unha serie de propostas para evitar o colapso desta zona vulnerable e de gran afluencia de xente.

• A modificación do percorrido do microbús lanzadeira que xa está en activo. Cremos que a saída debería facerse dende Fión, na bocarribeira, xa que a maior parte dos visitantes da praia proceden de fóra do Saviñao e non chegan a pasar por Escairón, onde está agora o punto de partida. Para conseguilo habería que habilitar un espazo de aparcamento para a saída. Poderíase valorar un segundo servizo dende Belesar.
• A circulación de senso único dende o desvío a Arxuá, pouco antes da igrexa románica da Cova, permitíndoselles o tránsito no senso contrario só aos propietarios de terras na ribeira. A baixada faríase pola igrexa da Cova, e a subida sería por Soutomango e Arxuá. Quedaría un curto espazo de circulación nos dous sensos, duns 300 metros, onde se xuntan as dúas estradas, que poderían estar regulados por semáforos.
• A sinalización do ancho da estrada e a prohibición de circulación de vehículos de máis de 6 metros de lonxitude, incompatibles co trazado sinuoso da estrada. Isto suporía que non poderían circular nin autobuses grandes nin autocaravanas.
• A colocación de paneis dixitais nas zonas de estacionamento e de saída dos microbuses, en Fión e Belesar, para informar da ocupación das prazas de aparcamento na área da praia e disuadir así de acodir cos vehículos.
• A protección estrita da paisaxe, que implica o rexeitar calquera ampliación do ancho da estrada.

Esperando que sexan atendidas estas necesidades que afectan ao territorio do Saviñao, despídese atentamente de vostede  a Presidenta da Asociación

Escairón a 3 de setembro do 2024.

A Asociación Veciñal do Saviñao, a través da súa Presidenta Celia Ferreiro Riazor, diríxese á Alcaldía do Saviñao coa intención de repoñer as balizas de seguridade da praia da Cova.

A praia da Cova xa é unha icona a nivel nacional. Nesta época estival é frecuentada por unha inxente cantidade de visitantes. Para garantir a seguridade na zona de baño, a Asociación Veciñal do Saviñao SOLICITA  do Concello a reposición das dúas balizas verticais, desaparecidas recentemente, que avisan do límite da zona de baño onde se fai pé e do profundo desnivel que empeza alí.

Coa intención de reforzar a seguridade e de evitar desgrazas, esperamos a colocación con carácter urxente desta sinalización.

Atentamente, a Presidenta da asociación.

Escairón, a 26 de xullo de 2024

A Asociación Veciñal do Saviñao diríxese á Delegación de Vías e Obras Públicas da área de Xestión Territorial da Deputación de Lugo, para solicitar o arranxo prioritario de dúas estradas provinciais no municipio.

Dende esta asociación veciñal de ámbito municipal dirixímonos á  Deputación Provincial para denunciar a precaria situación en que se encontran agunhas estradas de titularidade provincial no noso concello. Somos conscientes da inmensa cantidade de quilómetros de estradas de competencia da Deputación  no conxunto da provincia. Por iso, a nosa solicitude limítase ás vías que precisan unha atención urxente polo seu estado de deterioro e polo seu alto nivel de uso.

SOLICITAMOS do organismo provincial atención urxente a dúas estradas do noso municipio:

1. Estrada Monforte – Currelos (3202).

Esta estrada, que comunica todas as poboacións da metade norte do Concello do Saviñao coa cabeceira comarcal de Monforte de Lemos, polo que é moi transitada, presenta un excelente estado dende Monforte ata o límite deste municipio co do Saviñao, no lugar das Fontelas, pois foi arranxada recentemente con aglomerado. Pero na parte correspondente ao Saviñao, convértese nunha sucesións de fochancas que a fan intransitable en numerosos puntos (Ousende, Aiaz, A Broza, Estrumil, Forcados) ata practicamente Currelos.

Esta diferencia no estado da mesma estrada entre os concellos de Monforte e o do Saviñao supón un incomprensible agravio comparativo, polo que solicitamos o arranxo da parte correspondente ao temo municipal do Saviñao.

2. Estrada  CELEGA– Diomondi  (5806).

Esta vía, á parte de atravesar moitos lugares das parroquias de Freán, Louredo, Santa Mariña, Laxe e Diomondi, conduce á icónica igrexa románica de Diomondi e ao albergue do Camiño de Inverno de Santiago, polo que é unha estrada moi frecuentada pola veciñanza e por un gran número de visitantes. A capa de rodadura esta moi deteriorada e leva anos reclamando unha atención integral (capa de aglomerado en quente) mais aló dos traballos puntuais que xa son insuficientes pola degradación do firme.

Pedimos que se inclúan estas dúas estradas nos proxectos inmediatos de reparación e mantemento das estradas provinciais de titularidade da Deputación. Na espera de que sexan atendidas estas peticións veciñais, como o foron outras demandas da asociación despídese atentamente de vostede a Presidenta da asociación.

Escairón, a 10 de xullo do 2024.

Na data do 16 de outubro coñecemos que a Deputación comezou o arranxo da estrada Monforte – Currelos. Agradecidos pola pronta resposta, unha vez máis comprobamos a importancia das asociacións veciñais e a relación coas administracións.